Հանքավանում 8 տարի գերության մեջ եղած գորշ արջը փրկվել է
Հանքավանի հյուրանոցային համալիրներից մեկում շուրջ ութ տարի գերության մեջ պահված գորշ արջը վերջապես ազատ է արձակվել։ Շրջակա միջավայրի նախարարության տեղեկացմամբ՝ կենդանին տեղափոխվել է Վայրի կենդանիների փրկարար կենտրոն (WRC), որը գործում է FPWC հիմնադրամի հովանու ներքո։
Նշվում է, որ արջն այժմ անցնում է կարանտինացման շրջան, որից հետո նախատեսվում է նրան տեղափոխել մեծ ազատավանդակ։ Կենտրոնում կենդանին ստանում է անհրաժեշտ կենդանաբուժական խնամք և վերականգնողական թերապիա՝ ուղղված երկարատև բանտարկության հոգեբանական և ֆիզիկական հետևանքների մեղմմանը։
Արջի պահման անբարենպաստ պայմանների մասին հասարակական ահազանգերը հնչել էին դեռևս 2017 թվականից։ Փրկարար գործողությունը իրականացվել է 2025 թվականին FPWC-ի մասնագիտական թիմի, միջազգային գործընկեր «International Animal Rescue» (IAR) կազմակերպության և պետական կառույցների՝ Շրջակա միջավայրի նախարարության ու Բնապահպանական և ընդերքի տեսչական մարմնի համագործակցությամբ։
