Եկեղեցու խնդիրները պետք է լուծվեն ներսում, ոչ թե իշխանությունների միջամտությամբ. Գառնիկ Դանիելյան

«Հայաստան» խմբակցության պատգամավորը չի ժխտում եկեղեցու ներսում առկա խնդիրները, սակայն դրանք համարում է բացառապես եկեղեցու ներքին գործ:

Ազգային ժողովի «Հայաստան» խմբակցության պատգամավոր Գառնիկ Դանիելյանը խորհրդարանական ճեպազրույցի ընթացքում նշել է, որ չի ժխտում Հայ Առաքելական Սուրբ եկեղեցում խնդիրների առկայությունը, սակայն դրանք պետք է լուծվեն եկեղեցու ներսում՝ առանց պետական միջամտության։

«Չեմ կարող ժխտել, որ կան խնդիրներ, բայց դա չի նշանակում, որ եթե եկեղեցու ներսում կան որոշ հոգևորականների հետ կապված հարցեր, իշխանությունները պետք է ներգործություն թույլ տան։ Դա եկեղեցու ներքին գործն է»,– ընդգծել է Դանիելյանը։

Հիշեցնենք, որ վարչապետ Նիկոլ Փաշինյանը հունիսի 10-ին առաջարկել էր ստեղծել համակարգող խորհուրդ, որը պետք է քայլեր ձեռնարկի կաթողիկոսական նոր ընտրությունների կազմակերպման ուղղությամբ։ Ավելի վաղ վարչապետը Ն.Ս.Օ.Տ.Գ. Գարեգին Բ Ամենայն Հայոց կաթողիկոսին և մի շարք բարձրաստիճան հոգևորականների մեղադրել էր կուսակրոնության ուխտը խախտելու մեջ՝ հայտարարելով, որ նման պարագայում Գարեգին Բ-ն չի կարող շարունակել կաթողիկոսի պաշտոնում։

Ի պատասխան՝ եկեղեցական շրջանակները վարչապետին մեղադրել էին հակաեկեղեցական արշավ սկսելու մեջ։