Այս տարածաշրջանում խաղաղության հաստատումն անհնար է առանց Թուրքիայի. Սիմոնյան

ԱԺ նախագահ Ալեն Սիմոնյանը Թուրքիայում լրագրողների հետ հանդիպման ժամանակ, անդրադառնալով է հայ-ադրբեջանական հարաբերություններին, նշել է որ Հայաստանը որևէ տարածքային պահանջ չունի Ադրբեջանի նկատմամբ. 

«Մենք պատրաստ ենք և հետաքրքրված խաղաղության պայմանագրի կնքման հարցում։ Մենք որևէ խնդիր չենք տեսնում առևտրի համար տարածաշրջանը բացելու հարցում։ Ադրբեջանից Նախիջևան, ինչպես նաև Թուրքիա բեռները կարող են տեղաշարժվել ազատ՝ իհարկե, հաշվի առնելով Հայաստանի օրենսդրությունը և ինքնիշխանությունը»։

Ըստ Սիմոնյանի՝ Հայաստանն Ադրբեջանին մշտապես առաջարկել և առաջարկում է սահմանին տեղակայված զորքերի հայելային ետքաշում.

«Այս տարածաշրջանում խաղաղության հաստատումն անհնար է առանց Թուրքիայի, և մենք լիահույս ենք, որ Թուրքիան գործուն քայլեր կձեռնարկի տարածաշրջանում խաղաղության հաստատման հարցում»։

Հիշեցնենք, որ Ալեն Սիմոնյանի գլխավորած  պատվիրակությունն Անկարայում է` մասնակցելու  Սեւծովյան տնտեսական համագործակցության խորհրդարանական վեհաժողովի հիմնադրման 30-ամյակին նվիրված անդամ պետությունների խորհրդարանների ղեկավարների գագաթնաժողովին եւ Գլխավոր վեհաժողովի լիագումար նիստի աշխատանքներին: