Fox News-ից հեռացած Թաքեր Կարլսոնը` ամերիկյան մեդիայում արգելված թեմաների մասին
Որոշ թեմաներ չեն լուսաբանվում ամերիկյան ԶԼՄ-ներում, դրանք չեն թույլատրվում քննարկել լրատվամիջոցներում, ասել է Թաքեր Կարլսոնը՝ Fox News-ի նախկին հաղորդավարը, ով աշխատանքից ազատվել է ապրիլի 24-ին։ Այս մասին նա խոսել է Twitter-ի իր միկրոբլոգում հրապարակված տեսաուղերձում։
Այդ թեմաներից նա թվարկել է ժողովրդագրական փոփոխությունները, ազգային ռեսուրսները, քաղաքացիական ազատությունները, գիտության զարգացումը։ Նրա խոսքով` դրանք «ապագան որոշող հարցեր են», որոնց քննարկումը, սակայն, «անթույլատրելի է ամերիկյան լրատվամիջոցներում»։
Դա տեղի է ունենում Միացյալ Նահանգների երկու քաղաքական կուսակցությունների և նրանց դոնորների թելադրանքով, ասել է Կարլսոնը:
Բացի այդ, լրագրողն ասել է, որ «բանավեճերը», որոնք այժմ ընթանում են երկրի ԶԼՄ-ներում, «անհավանական հիմարություն են», «բոլորովին անտեղի» և «ոչինչ չեն նշանակում»։ Նա կարծում է, որ հինգ տարի հետո դրանց մասին չեն էլ հիշի։
Նախկին հաղորդավարը չի նշել Fox News-ի հետ կապված իրավիճակը, իսկ վերջում հավելել՝ շուտով կհանդիպենք։
Կարլսոնը 2016 թվականից վարել է Tucker Carlson Tonight-ը Fox News հեռուստաալիքով: Այն ամերիկյան հեռուստատեսության ամենահայտնի շոուներից մեկն էր և իր վարկանիշով գերազանցում էր CNN-ի և MSNBC-ի շոուներին, նշում է NBC News-ը:
Fox News-ի հաղորդագրության մեջ նշվում է, որ Կարլսոնի հեռանալու որոշումը կայացվել է հեռուստահաղորդավարի և հեռուստաալիքի ղեկավարության համաձայնությամբ։
Հաղորդավարը բազմիցս քննադատել է ամերիկյան վարչակազմի գործողությունները։
Անցյալ հունիսին նա ասել է, որ երկրի վարչակազմը միտումնավոր դրդում է Եվրամիությանը էմբարգո սահմանել ռուսական նավթի ներկրման վրա. ապրիլին նա խոսել է ռազմական գործողությունների ընթացքում Ուկրաինայի կրած ձախողումների և դրա հետ կապված ԱՄՆ-ի «խուճապի» մասին։
