Զելենսկին առաջ է քաշել 10 կետից բաղկացած խաղաղության ծրագիր. Չավուշօղլու
Թուրքիայի արտգործնախարար Մևլութ Չավուշօղլուն ասել է, որ Անկարան աջակցում է Կիևի՝ Ուկրաինայում իրավիճակի կարգավորման 10 կետից բաղկացած ծրագրին: Ինչպես գրում է ՌԻԱ «Նովոստի»-ն, ըստ Չավուշօղլուի՝ թուրքական կողմն աշխատում է փաստաթղթի վրա։
«Մենք կարծում ենք, որ այս պատերազմը կավարտվի բանակցությունների սեղանի շուրջ, լավ կլինի, եթե դրան հասնենք որքան հնարավոր է շուտ։ Անցյալ տարվա մարտին Ստամբուլում որոշակի զարգացումներ եղան, բայց ի հայտ եկան նոր պարամետրեր ու իրողություններ։ Ռուսաստանը հիմա իր պատրաստակամությունն է հայտնում բանակցությունների համար, Զելենսկին առաջ է քաշել 10 կետից բաղկացած ծրագիր: Մենք՝ Թուրքիան, աջակցում ենք այս ծրագրին և աշխատում ենք դրա վրա»,- ասել է Չավուշօղլուն Հարավային Աֆրիկայում կայացած մամուլի ասուլիսում։
Ավելի վաղ Ուկրաինայի արտաքին գործերի նախարար Դմիտրի Կուլեբան հայտարարել էր, որ ուկրաինական իշխանությունները ցանկանում են մինչև փետրվարի վերջ «խաղաղության գագաթնաժողով» անցկացնել ՄԱԿ-ի տարածքում՝ կազմակերպության գլխավոր քարտուղար Անտոնիո Գուտերեշի հնարավոր միջնորդությամբ։
Ավելի վաղ ամերիկյան The Wall Street Journal թերթը, հղում անելով եվրոպական և ուկրաինական դիվանագիտական շրջանակների աղբյուրներին, հայտնել էր, որ Ուկրաինայի նախագահ Վլադիմիր Զելենսկու շրջապատը վերջնական տեսքի է բերում Ուկրաինայում՝ տասը կետից բաղկացած «խաղաղության ծրագիրը» և մտադիր է փետրվարին ներկայացնել իր գաղափարները։ Զելենսկին ավելի վաղ հայտնել էր, որ G20-ի գագաթնաժողովում առցանց ելույթի ժամանակ բարձրաձայնել է Ուկրաինայում խաղաղության վերականգնմանն ուղղված քայլերի իր տեսլականը, որը բաղկացած է 10 կետից։ Ավելի վաղ ՌԴ նախագահ Վլադիմիր Պուտինը Թուրքիայի նախագահ Թայիփ Էրդողանի հետ հեռախոսազրույցում հաստատել էր Ուկրաինայի վերաբերյալ երկխոսության նկատմամբ Ռուսաստանի բաց լինելը պայմանով, որ Կիևը կատարի հայտնի պահանջները և հաշվի առնի նոր տարածքային իրողությունները։
