Անձնական օգնականի ծառայություններ` հաշմանդամություն ունեցող առավել կարիքավոր անձանց համար. կառավարությունը որոշում ընդունեց
Այսօր ՀՀ կառավարության նիստում որոշում ընդունվեց, որ հաշմանդամություն ունեցող առավել կարիքավոր անձինք կկարողանան օգտվել անձնական օգնականի ծառայություններից։
Աշխատանքի և սոցիալական հարցերի նախարարի տեղակալ Աննա Ժամակոչյանն ասաց, որ անձնական օգնական կարող են ստանալ հենաշարժողական, տեսողական ու հոգեկան-մտավոր խնդիրներ ունեցող, ֆուկցիոնալության խոր սահմանափակում ունեցող անձինք, որոնց ընտանիքները հաշվառված են ընտանեկան նպաստի համակարգում։
«Այս պահին սահմանված է 10-ից բարձր անապահովության միավորը։ Սա կարող է վերանայվել, հատկապես անապահովության համակարգի վերանայման դեպքում»,- ասաց փոխնախարարը։
«Անձնական օգնական կարող է լինել նաև ընտանիքի անդամը։ Սա շատ կարևոր է հատկապես այն դեպքերում, երբ հաշմանդամություն ունեցող անձն ունի 10 ժամից ավելի ծառայություն ստանալու կարիք»,- ասաց նա։
Անձնական օգնականի պարտականությունների մեջ է մտնում ոչ միայն անձի խնամքը, ուղեկցումը, այլև բնակության վայրի մաքրությունը, սննդի ու դեղորայքի գնումները։
Որոշումն ուժի մեջ է մտնելու 2024թ-ի հունվարի 1-ից, բայց 2023թ-ին կիրականացվի փորձնական ծրագիր, որի արդյունքներով ընդունված կարգի մեջ շտկումներ կիրականացվեն։
Նախնական հաշվարկով` անձնական օգնականի ծառայության մատուցման համար կպահանջվի 5 186 160 000 դրամ։ Հաշվարկը կատարվել է ժամավճարի սկզբունքով՝ 1 ժամվա համար 1050 ՀՀ դրամ։
