Մանրամասներ. Բեռլինում հայազգի տղամարդու ավտոմեքենայում հայտնաբերվել է հանցագործության խոստովանությամբ նամակ
Նախօրեին Բեռլինում մեքենայի՝ մի խումբ անցորդների վրաերթի ելթարկելու հետևանքով տուժածների թիվը հասել է 29-ի։ Այս մասին այսօր հայտնել է Focus online-ը՝ վկայակոչելով տեղի ոստիկանությանը։
Դրա փոխանցմամբ՝ միջադեպի հետևանքով մեկ մարդ մահացել է, 29-ը՝ վիրավորվել։ Տեղի ունեցածի հետաքննությունն այս պահին շարունակվում է։
Միջադեպը տեղի է ունեցել հունիսի 8-ին Բեռլինի տեսարժան վայրերից մեկը համարվող Շառլոտենբուրգ թաղամասում։
Renault Clio մեքենայով տղամարդը մխրճվել է ամբոխի մեջ և հետո բախվել խանութի ցուցափեղկին: Ազգությամբ հայ վարորդին անմիջապես բերման են ենթարկել անցորդները և հանձնել ոստիկանություն։
Berliner Zeitung թերթը, հղում անելով աղբյուրներին, հայտնում է, որ գերմանացի քննիչները կատարվածն ահաբեկչություն չեն համարում, բայց ելնում են նրանից, որ վարորդը դա արել է դիտավորյալ։
Berliner Zeitung-ը նշել է, որ կասկածյալի՝ Գերմանիայի՝ ազգությամբ հայ 29-ամյա քաղաքացու ավտոմեքենայում հայտնաբերվել է հանցագործության խոստովանությամբ նամակ։ Սակայն, ըստ քննիչների, նրա արարքում իբր քաղաքական դրդապատճառներ չկան։ Այնուհանդերձ, իշխանությունները կարծում են, որ երիտասարդը զանգվածային սպանություն է կատարել, սակայն նրա դրդապատճառները դեռ պարզ չեն։
