Մոլդովան ռուսական գազին այլընտրանք չունի. երկրի նախագահ
Մոլդովան ռուսական գազին այլընտրանք չունի, քանի որ շուկայում կապույտ վառելիքի գնումը թանկ կարժենա երկրի վրա։ Այս մասին ապրիլի 27-ին հայտարարել է Հանրապետության նախագահ Մայա Սանդուն։
«Մենք չենք կարող հրաժարվել (ռուսական) գազից այն պայմաններում, երբ այլընտրանք չկա, բացի այդ, էլեկտրաէներգիան նույնպես գազից է կախված, այստեղ էլ այլընտրանք չկա, քանի որ գործնականում մենք կապված չենք Ռումինիայի հետ։ Մենք շատ ծանր վիճակում ենք»,- ասել է նա «Jurnal» հեռուստաալիքի եթերում։
Սանդուն մանրամասնել է, որ մայիսի 1-ից ռուսական «Գազպրոմ» ընկերության հետ պայմանագրի խզման պայմաններում Մոլդովան ստիպված կլինի գազ գնել շուկայից։ Միևնույն ժամանակ, պոտենցիալ մատակարարների առաջարկները «բավարարված չեն, քանի որ դրանք շատ թանկ են», - եզրափակել է Հանրապետության ղեկավարը։
