Լավրովի և Կուլեբայի հանդիպումը հնարավոր է Ստամբուլում կամ Անթալիայում. Չավուշօղլու
Թուրքիայի արտաքին գործերի նախարարության ղեկավար Մևլութ Չավուշօղլուն հայտարարել է, որ Ռուսաստանի և Ուկրաինայի արտգործնախարարներ Սերգեյ Լավրովի և Դմիտրի Կուլեբայի հանդիպումը հնարավոր է Ստամբուլում կամ Անթալիայում։ Այս մասին հայտնում է РИА Новости-ն՝ հղում անելով CNN Turk-ին։
«Ես կողմերին առաջարկել եմ Ստամբուլում կամ Անթալիայում անցկացնել Ռուսաստանի Դաշնության և Ուկրաինայի արտգործնախարարների հանդիպումը։ Այս հանդիպումը հնարավոր է»,- ասել է Չավուշօղլուն։
Նա ընդգծել է, որ նման բանակցություններ արդեն տեղի են ունեցել Անթալիայում ընթացող դիվանագիտական ֆորումի շրջանակներում։
Ավելի վաղ Չավուշօղլուն ասել էր, որ դժվար է խոսել Թուրքիայում ՌԴ նախագահ Վլադիմիր Պուտինի և Ուկրաինայի նախագահ Վլադիմիր Զելենսկու հանդիպման ժամկետների մասին, սակայն Անկարան հույս ունի, որ դա տեղի կունենա շուտով։
