Փաշինյանն արդարացվեց «Մարտի 1-ի» գործով
ՀՀ վարչապետ Նիկոլ Փաշինյանը «Մարտի1-ի» գործով արդարացվեց։
Վճռաբեկ դատարանը` դատավոր Համլետ Ասատրյանի նախագահությամբ, բեկանեց ՀՀ վարչապետ Նիկոլ Փաշինյանի վերաբերյալ 2010 թվականին կայացրած դատավճիռը։
Նիկոլ Փաշինյանի վերաբերյալ ՀՀ քրեական օրենսգրքի 225-րդ հոդվածի 1-ին մասով (Զանգվածային անկարգություններ) Երևանի առաջին ատյանի ընդհանուր իրավասության դատարանի 2010 թվականի հունվարի 19-ի դատավճիռը և ՀՀ վերաքննիչ քրեական դատարանի 2010 թվականի մարտի 9-ի որոշումը բեկանվեց։ Նիկոլ Փաշինյանը ՀՀ քրեական օրենսգրի 225-րդ հոդվածի 1-ին մասով առաջադրված մեղադրանքում ճանաչվեց անմեղ և արդարացվեց։
Ըստ Վճռաբեկ դատարանի որոշման՝ քրեական գործի վարույթը կարճվեց հանցակազմի բացակայության պատճառաբանությամբ։
ԵԿՄ վարչության նախագահ, ԱԺ նախկին պատգամավոր Սասուն Միքայելյանը ևս «Մարտի 1»-ի գործով արդարացվեց։ Նա այդ գործով մեղադրվում էր զանգվածային անկարգություններ կազմակերպելու մեջ:
Վճռաբեկ դատարանը, նախագահությամբ դատավոր Համլետ Ասատրյանի, հրապարակեց որոշում, որով բեկանեց Միքայելյանի վերաբերյալ 2009 թվականին կայացված դատավճիռը՝ նրան ճանաչելով անմեղ։
Հիշեցնենք` ՀՀ գլխավոր դատախազ Արթուր Դավթյանը վճռաբեկ բողոք էր ներկայացրել՝ պահանջելով բեկանել տարիներ առաջ Նիկոլ Փաշինյանի գործով կայացված մեղադրական դատավճիռը և արդարացնել նրան։
