«Գազ գնելու համար պետք է ռուբլով հաշիվներ բացեն ՌԴ բանկերում, բարեգործություն չենք անելու». Պուինը հրամանագիր է ստորագրել

 «Այսօր ես հրամանագիր եմ ստորագրել, որը սահմանում է ռուսական բնական գազի առևտրի կանոնները ոչ բարեկամ երկրների հետ գազի առևտրի կանոնների մասին», - TАСС-ի փոխանցմամբ այս մասին հայտնել է ՌԴ նախագահ Վլադիմիր Պուտինը:

Պուտինը պարզաբանել է, թե ինչպես է աշխատելու էներգառեսուրսների դիմաց վճարման նոր համակարգը։ 

«Նման երկրների կապալառուներին մենք առաջարկում ենք հստակ և թափանցիկ սխեմա՝ ռուսական բնական գազ գնելու համար նրանք պետք է ռուբլով հաշիվներ բացեն ռուսական բանկերում, հենց այդ հաշիվներից են, որ վաղվանից՝ ապրիլի 1-ից, կկատարվեն մատակարարվող գազի դիմաց վճարումները»,- հայտարարել է նախագահը։

Միաժամանակ, ՌԴ նախագահն ընդգծել է, որ եթե վճարումների ռիթմի խախտումներ լինեն, ապա դրան համար կսահմանվեն պատժամիջոցներ։ «Եթե վճարումները չկատարվեն, մենք դա կհամարենք գնորդների դեֆոլտ՝ դրանից բխող բոլոր հետեւանքներով», - ասաց նա։

«Ոչ ոք մեզ ոչինչ չի վաճառում անվճար, մենք էլ բարեգործություն չենք անելու, այսինքն՝ կդադարեցվեն գործող պայմանագրերը»,- ընդգծել է Պուտինը։