Վաշինգտոնում ՌԴ դեսպանատան պատասխանը` ԱՄՆ-ից հնչող պատժամիջոցների սպառնալիքներին
Ռուսաստանը չի պատրաստվում հետ քաշվել ԱՄՆ-ի կողմից պատժամիջոցների սպառնալիքների պատճառով, որոնք հանդես են գալիս երկկողմ հարաբերություններում լարվածության գեներացմամբ։ Այս մասին Facebook-ի իր էջում հայտարարել է Վաշինգտոնում ՌԴ դեսպանատունը:
«Լարվածության գեներատորը ոչ թե Մոսկվան է, այլ Վաշինգտոնը։ Մենք չենք պատրաստվում հետ քաշվել՝ ականջ դնելով ամերիկյան պատժամիջոցների սպառնալիքներին»,- ասված է դիվանագիտական առաքելության հայտարարության մեջ:
Դեսպանատանն ընդգծել են, որ հենց ԱՄՆ-ն է խրախուսել Կիևում արմատական-ազգայնական պետական հեղաշրջումը, որի արդյունքում Ղրիմի բնակիչները հայտնվել են ոչնչացման սպառնալիքի տակ և քվեարկել են Ռուսաստանի հետ վերամիավորման օգտին:
Այնտեղ հիշեցրել են, որ Վաշինգտոնն ուկրաինական իշխանություններին ժամանակակից հարձակողական սպառազինություններ է մատակարարում՝ համակերպվելով Դոնբասի խնդիրը ուժային ճանապարհով լուծելու Վլադիմիր Զելենսկու կառավարության ձգտման հետ։
Ռուս դիվանագետները ԱՄՆ-ին նաև մեղադրել են այն բանում, որ նրանք անվտանգության անբաժանելիության սկզբունքի խախտմամբ տարածել են իրենց ռազմական ենթակառուցվածքը՝ մինչև ռուսական սահմաններ: Ընդ որում, հայտարարության մեջ ընդգծվում է, որ Ռուսաստանն իր տարածքում զինված ուժեր տեղափոխելու ինքնիշխան իրավունք ունի, և դա ոչ մեկին չի սպառնում:
