Յուրի Խաչատուրովի նկատմամբ սահմանահատումների արգելքը վերացվեց
ՀՀ Քրեական վերաքննիչ դատարանը՝ Նարինե Հովակիմյանի նախագահությամբ սկսել է սահմանադրական կարգի ենթադրյալ տապալման մեղարդանքով Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի դեմ հարուցված քրեական գործի կարճման վերաբերյալ պաշտպանների և պետական մեղադրողների բողոքների քննությունը:
Նախորդ նիստին պետական մեղադրող Գևորգ Բաղդասարյանը միջնորդել էր գործի վարույթը կասեցնել և դիմել ՍԴ: Վերաքննիչ դատարանը որոշել էր միջնորդության լուծումը հետաձգել և որոշում կայացնել վերջնական դատական ակտով: Այս նիստի սկզբում Յուրի Խաչատուրովի պաշտպան Միհրան Պողոսյանը դիմել էր դատարանին՝ խնդրելով վերացնել Յուրի Խաչատուրովի տեղաշարժի ու մասնավորապես սահմանահատումների արգելքն այն հիմքով, որ նրա նկատմամբ հարուցված քրեական գործը կարճվել է, և խափանման միջոցը՝ վերացվել: Մեղադրող կողմը չառարկեց դիմումի դեմ, առարկեց սակայն տուժողների և տուժողների իրավահաջորդների ներկայացուցիչ Սեդա Սաֆարյանը․
«Չեմ միանում ո՛չ մեղադրողների, ո՛չ պաշտպանների կարծիքին: Վերաքննիչ բողոքի հիմքով պայմանավորված կարող է իրավիճակ փոխվել, և եթե Յուրի Խաչատուրովի և Սեյրան Օհանյանի նկատմամբ իմ կողմից վերաքննիչ բողոքի՝ նշված հանցագործության հիմքով մեղադրանք առաջադրելու հնարավորություն լինի, ապա խափանման միջոցը պահպանելու անհրաժեշտություն կլինի: Խափանման միջոցն ու արգելանքի որոշումները հետագայում կարող են անհրաժեշտություն լինել»:
Դատարանը վերացրեց Յուրի Խաչատուրովի նկատմամբ սահմանահատումների արգելքը և անցավ վերաքննիչ բողոքների քննությանը:
Հիշեցնենք՝ 2021 թվականի ապրիլի 6 -ին Երևանի ընդհանուր իրավասության դատարանի դատավոր Աննա Դանիբեկյանը բավարարեց Ռոբերտ Քոչարյանի պաշտպանների միջնորդությունը և հակասահմանադրական ճանաչված ՀՀ Քր. Օր. 300.1 հոդվածով քրեական հետապնդումը դադարեցրեց։ Ավելի վաղ ՍԴ-ը հակասահմանադրական և անվավեր էր ճանաչել Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի դեմ հարուցված քրեական գործը՝ սահնմանադրական կարգի տապալման հատկանիշով:
