Նուրսուլթան Նազարբաևը խոսել է նախագահի պաշտոնից հրաժարվելու պատճառների մասին

Ղազախստանի պաշտոնաթող նախագահ Նուրսուլթան Նազարբաևը պաշտոնը թողնելուց 7 ամիս անց խոսել է իր դրդապատճառների մասին։ Ասում է՝ չէր ուզում հոգնեցնել իր մշտական պաշտոնավարմամբ։ Այս մասին նա հարցազրույց է տվել ղազախական լրատվամիջոցներից մեկին։ 


Նազարբաևի խոսքով՝ այդ քայլը եղել է լավ մտածված, ու ինքը չի փոշմանել։ Նա ասել է, որ իր կարծիքով՝ երկար ժամանակ նույն ղեկավարին տեսնելով՝ բնակչությունը կարող էր հոգնել այդ ամենից, և նոր մարդիկ էին պետք, նոր կարգեր, փոփոխություններ։ Նազարբաևը Ղազախստանը ղեկավարում էր գրեթե 30 տարի՝ երկրի անկախացումից ի վեր։ 

Նա պատմել է, որ իր իշխանության տարիները դժվարին ժամանակաշրջան են եղել Ղազախստանի կայացման ճանապարհին, իսկ հիմա անհրաժեշտ է, որ նոր իշխանությունն ամրապնդի արդեն եղած հաջողությունները։ 

Իրականում, հիշեցնենք, թեև Նազարբաևը հրաժարվել է երկրի նախագահի պաշտոնից, սակայն փաստացի կառավարում է երկիրը ԱԱԽ նախագահի պաշտոնը ստանձնելով։