Մենք չունենք թշնամի գործարարներ, ՀՀ-ում չկա բաժանում ընդդիմադիր և իշխանամետ գործարարների. վարչապետ
Այս տարի մենք, ըստ ամենայնի, կունենաnք պլյուս մինուս յոթ տոկոսանոց տնտեսական աճ, ինչը շատ կարևոր և բարձր ցուցանիշ է ԵԱՏՄ, Եվրոպական երկրների տարածքում: Այս մասին այսօր Արագածոտնի մարզի Սասունիկ համայնքում գտնվող «Արմենիա Վայն» գինու գործարանում ընթացող «Իմ քայլը՝ հանուն Արագածոտնի մարզի» խորագրով ներդրումային համաժողովի ընթացքում իր ելույթում ասաց վարչապետ Նիկոլ Փաշինյանը:
«Հասկանալի է, որ մեր բազան շատ ցածր է և 7 տոկոս աճն այն ցուցանիշը չէ, որից պետք է շատ երջանիկ զգանք մեզ»,-ասաց նա: Վարչապետը կարևորեց Կառավարության և բիզնես շրջանակների միջև փոխգործակցությունը և նշեց, որ դրա համար բոլոր հնարավորություններն ստեղծված են:
«Այսօր Հայաստանի Հանրապետությունում չկա բաժանում ընդդիմադիր և իշխանամետ գործարարների: Գործարարների շրջանում մենք չունենք ընդհանրապես թշնամիներ, բոլոր գործարարներին համարում ենք թիվ մեկ դաշնակիցը, քանի որ տնտեսական հեղափոխությունը, առանց դաշնակցելու գործարարների հետ, հնարավոր չէ և մեր մեծագույն խնդիրն է, որ ՀՀ-ում յուրաքանչյուր գործարար իրեն զգա պաշտպանված»,-ասաց նա:
Նիկոլ Փաշինյանն իր խոսքում նշեց, որ կարևոր է անհատական ջանքը, որն էլ պետք է բերի տնտեսական հեղափոխության և հավելեց, որ աղքատության հաղթահարման միջոցը տեսնում են քաղաքացիներին քաջալերելու մեջ, որ վերջիններս ՀՀ-ում ստեղծեն բիզնես և ոտքի կանգնեն: «Բարեգործության այն մոդելը, որը երկար տարիներ կիրառվել է Հայաստանում, դեգրադացրել է մեր տնտեսական հարաբերությունները և դա շատ դեպքերում մարդուն ոչ թե օգնել է, այլ խանգարել»,-ասաց նա և նշեց, որ ՀՀ յուրաքանչյուր քաղաքացի պետք է արձանագրի, որ իր հացը պետք է իր քրտինքով վաստակի, և հեղափոխության իմաստը սա է:
«Տնտեսական հեղափոխությունը Հայաստանի Հանրապետությունում մեկնարկած է և էլի ուզում եմ ասել, որ տնտեսական հեղափոխությունը, ինչպես ամեն ինչ, որը կապված է քաղաքակրթության հետ, նախ տեղի է ունենում մարդկանց մտքում»-ասաց նա:
Վարչապետը նշեց, որ այսօր տաղանդի մրցակցությունը տնտեսական թիվ մեկ գործոնն է: «Նախ պետք է փոխենք ինքներս մեզ, մեր միջավայրը և փոխենք մեր հայրենիքը, որը պետք է դառնա բոլորիս համընդհանուր երազանքների երկիր, ոչ թե մի քաղաքական թիմի երազանքի երկիր, ոչ թե անհատի, այլ մենք մեր երազանքները պետք է լցնենք մի կաթսայի մեջ և այդ կաթսայի մեջ պետք է եփի և մարմին ստանա մեր ազգային երազանքը: Տնտեսական հեղափոխությունը մեր ազգային երազանքների իրականացման մասին է, որովհետև մեր երազանքներն իրականցնելու համար մենք պետք է ունենանք հզոր պետություն և դրանից առաջ պետք է ունենանք հզոր տնտեսություն»,-ասաց նա:
