Բաքվի առաջարկը անհեթեթության եւ ցինիկութուն է. Դավիթ Բաբայան

Ադրբեջանական կողմի առաջարկը ոչ միայն անհեթեթ է, այլեւ բարոյականության եւ Միջազգային մարդասիրական իրավունքի ուղղակի խախտում է։ Այս մասին ասել է Արցախի նախագահի աշխատակազմի ղեկավարի տեղակալ, նախագահի աշխատակազմի Գլխավոր տեղեկատվական վարչության պետ Դավիթ Բաբայանը՝ NEWS.am-ին մեկնաբանելով  Ադրբեջանի պետհանձնաժողովի հայտարարությունը։

«Հատկանշական է, որ դիմումը միջազգային կառույցներ, ինչպես երեւում է հայտարարությունից, ուղարկվել է սեպտեմբերի 11-ին։ Դրանով իսկ ադրբեջանական կողմը ենթագիտակցաբար մատնում է իր ահաբեկչական նկրտումները՝ ցինիկություն է այն օրը, երբ ամբողջ աշխարհը նշում է ահավոր ահաբեկչական գործողության տարելիցը, պահանջել վերադարձնել ահաբեկիչներին»,- ընդգծել է Դավիթ Բաբայանը։

Անդրդրադառնալով Ասքերովին եւ Գուլիեւին Ադրբեջանին վերադարձնելու հարցին, Բաբայանը նշել է․ «Ինչ վերաբերում է Ասքերովին եւ Գուլիեւին, այս մարդիկ ծանր հանցագործություններ են կատարել, այդ թվում անչափահասի սպանություն։ Նրանք դատարանի կողմից միջազգային դիտորդների, իրավապաշտպանների եւ ԶԼՄ-ների մասնակցությամբ բաց դատավարությամբ են դատապարտվել»։

 Միաժամանակ, Դավիթ Բաբայանը փաստել է միջազգային իրավասու կառույցների լիակատար անգործությունն ի պատասխան Ադրբեջանի ցինիկ հայտարարությունների։ «Ոչ ոք անգամ որեւէ նկատողություն չի արտահայտել»,- ամփոփել է Բաբայանը։