2 միլիարդ դրամ լրացուցիչ միջոցներ կմուտքագրվեն պետբյուջե. Ատոմ Ջանջուղազյան
Ֆինանսների նախարար Ատոմ Ջանջուղազյանը չի շտապում ասել, թե ինչ ճակատագիր կունենան գազավորված ըմպելիքների, գրավատների և փոխանակման կետերի վերաբերյալ հարկային բեռի փոփոխությունները։
«Այդ դեպքում իմ կողմից որևէ հայտարարություն, ոչ թե կանխատեսում, այլ գուշակություն կլինի»,- այսօր Ազգային Ժողովում լրագրողներին ասաց նա։ Ինչ վերաբերում է քննադատություններին, հատկապես 60 անգամ տուրքի բարձրացման մասով, նախարարը նշեց, թե ինքը քննադատություններին նորմալ է վերաբերվում։
«Իսկ ուղղակի հարկերի բեռի նվազեցումն առնվազն կարճաժամկետ և միջնաժամկետ հատվածում ենթադրում է ռիսկ, որ պակաս բյուջեի եկամուտներ կհավաքվեն, հետևաբար այդ պակաս հավաքված եկամուտներն առնվազն կարճաժամկետ ու միջնաժամկետ հատվածում ենթադրում են եկամուտների պակաս հավաքման ռիսկ։ Քանի որ մենք ունենք պարտքի սահմանափակում, հետևաբար շեշտադրումը պետք է տեղափոխենք կապիտալի և եկամտի հարկումից սպառման հարկերին։
Սպառման հարկերի մեջ դիտարկել են հնարավոր բոլոր տարբերակները, նպատակահարմար է գտնվել ձեռնպահ մնալ հիմնական եկամուտի աղբյուր հանդիսացող ավելացված արժեքի հարկին ձեռք տալուց, քանի որ դա մեր երկրի մրցունակության համար կարող է ռիսկեր պարունակել։ Ճանապարհը մնաց սպառման հարկերին, որոնց մեջ մտնում են ակցիզային հարկերը և գործունեության առանձին տեսակները»,- ընդգծեց Ատոմ Ջանջուղազյանը։
Ջանջուղազյանը հավելեց, որ պետտուրքի փոփոխություններով ակնկալվում է, որ 2 միլիարդ դրամ լրացուցիչ միջոցներ կմուտքագրվեն պետական բյուջե։
