Պայթյուններ՝ Մակրոնի հյուրանոցի հարևանությամբ․ նոր մանրամասներ՝ Ֆրանսիայի նախագահի գտնվելու վայրի և առողջական վիճակի մասին

Ավելի վաղ հայտնել էինք, որ Սիրիայի մայրաքաղաք Դամասկոսի «Four Seasons» հյուրանոցի մոտակայքում երկու պայթյուն է տեղի ունեցել: Այդ հյուրանոցում է գիշերել Ֆրանսիայի նախագահ Էմանուել Մակրոնը, որը պաշտոնական այցով գտնվում է Սիրիայում։ 

Ելիսեյան պալատի հաղորդմամբ՝ միջադեպի հետևանքով Ֆրանսիայի ղեկավարը որևէ վնասվածք չի ստացել։

Տեղի անվտանգության ծառայությունների տվյալներով՝ պայթուցիկ սարքերից մեկը տեղադրված է եղել աղբամանում, իսկ երկրորդը՝ հյուրանոցի հարևանությամբ կայանված ավտոմեքենայի մեջ։ Ինչպես հայտնում են ֆրանսիական լրատվամիջոցները, Էմանուել Մակրոնն արդեն ժամանել է Սիրիայի նախագահական պալատ, որտեղ նախատեսված է նրա հանդիպումը երկրի ղեկավար Ահմեդ աշ-Շարաայի հետ։

Սիրիական SANA պետական գործակալությունը, հղում անելով երկրի ներքին գործերի նախարարությանը, հայտնում է, որ միջադեպի հետևանքով կան տուժածներ։ Վերջին տվյալներով՝ հիվանդանոց է տեղափոխվել առնվազն 18 մարդ, որոնցից չորսը տեղի իրավապահ մարմինների աշխատակիցներ են։ Դեպքի վայրում աշխատում են քննիչներն ու փորձագետները՝ պարզելու կատարվածի բոլոր հանգամանքները։