Գերմանիան նախատեսում է ստեղծել բնական գազի ռազմավարական պաշար՝ 1,5 մլրդ եվրոյի չափով։

Գերմանիայի կառավարությունը նախատեսում է մինչև 1,5 մլրդ եվրո հատկացնել 2,3 մլրդ խորանարդ մետր ծավալով բնական գազի ռազմավարական պաշար ստեղծելու համար։ Այս մասին տեղեկացնում է Reuters-ը:

Նախաձեռնության նպատակն է ապահովել երկրի էներգամատակարարումը արտակարգ իրավիճակներում, օրինակ՝ էներգետիկ ենթակառուցվածքների նկատմամբ դիվերսիայի կամ համաշխարհային շուկայում գազի կտրուկ պակասի դեպքում։ Ծրագիրը մշակում է Գերմանիայի էկոնոմիկայի նախարարությունը, և այն կարող է հաստատվել մինչև օգոստոսի կեսերը։

Նախատեսվող պաշարը կկազմի երկրի գործող ստորգետնյա գազապահեստների ընդհանուր տարողության մոտ 10%-ը։ Գազի ձեռքբերման և պահեստավորման աշխատանքները նախատեսվում է իրականացնել 2027-2028 թվականներին։

Ըստ նախնական գնահատականների՝ ծրագրի իրականացումը կարժենա 1,2-1,5 մլրդ եվրո, իսկ ռազմավարական պաշարի տարեկան պահպանման ծախսերը կկազմեն 150-180 մլն եվրո։