ՆԱՏՕ-ի նոր պահանջը խնդիր է դարձել Բելգիայի համար․ երկիրը չի հասցնում 3,5 տոկոսի շեմին

Բելգիայի իշխանությունները փորձում են խուսափել ԱՄՆ նախագահ Դոնալդ Թրամփի հնարավոր քննադատությունից, քանի որ ՆԱՏՕ-ի շրջանակում պաշտպանության ոլորտի ծախսերը ավելացել են և Բելգիան խնդիր ունի ծախսերը վճարելու հետ։ Այս մասին հայտնում է Politico-ն։

Բելգիայի պաշտպանության նախարար Թեո Ֆրանկենը նշել է, որ թեև Եվրոպայի պաշտպանական կարողությունների ամրապնդման գործընթացը շարունակվում է, կարևոր է չսրել հարաբերությունները Վաշինգտոնի հետ։

«Մենք ամերիկացիների կարիքն ունենք, պետք է դիվանագիտական լինել, լսել նրանց ասածը և փորձել լինել զգույշ»,- ասել է Ֆրանկենը։

Մոնիթորինգի զեկույցի համաձայն՝ եթե պահպանվեն ծախսերի ներկայիս միտումները, Բելգիան մինչև 2029 թվականը պաշտպանության ոլորտին կուղղի ՀՆԱ-ի միայն 1,93 տոկոսը։

Այս ցուցանիշը զգալիորեն ցածր է ՆԱՏՕ-ի նոր նպատակային պահանջից, ըստ որի՝ դաշինքի անդամ երկրները մինչև 2035 թվականը պետք է ռազմական ծախսերը հասցնեն ՀՆԱ-ի 3,5 տոկոսի։

Politico-ն նշում է, որ ստեղծված իրավիճակը կարող է Բելգիային դարձնել Թրամփի քննադատության թիրախ, քանի որ ԱՄՆ նախագահը բազմիցս պահանջել է դաշնակիցներից ավելի մեծ ներդրում կատարել պաշտպանության ոլորտում։