Տիրանայում ալբանական ընդդիմության կողմնակիցները ճեղքել են ոստիկանական շարքը եւ փորձել ներխուժել այն շենք, որտեղ տեղակայված է վարչապետ Էդի Ռամայի գրասենյակը: Տեղի լրատվամիջոցները հաղորդում են, որ ցուցարարները երկաթե իրերով փորձել են կոտրել շենքի դռները,ինչպես նաև քարեր են նետել պատուհանների ուղղությամբ: Դրան ի պատասխան ոստիկաններն արցունքաբեր գազ են կիրառել: Նշվում է, որ և՛ ցուցարարների, և՛ իրավապահների մեջ վիրավորներ կան: Ալբանիայի նախագահ Իլիր Մետան կոչ է արել ցույցը խաղաղ անցկացնել և չմոռանալ պետական ինստիտուտների հանդեպ հարգանքի մասին։ Ընդդիմությունը իշխանություններին մեղադրում է կոռուպցիայի համար: Հիշեցնենք, որ 2018թ․ դեկտեմբերի վերջին Ալբանիայի խորհրդարանում Էդի Ռամայի վրա ձվեր էին նետել։