Իտալիայում շներն արդեն ավելի շատ են, քան երեխաները

Իտալիայում ընտանի կենդանիների քանակական ցուցանիշը զգալիորեն առաջ է անցել երեխաների թվից։ ըստ «Ասալկո» կենդանիների արդյունաբերության ասոցիացիայի տվյալների՝ երկրում հաշվվում է մոտ 53.6 միլիոն ընտանի կենդանի, որոնցից ավելի քան 25 միլիոնը ձկներ են, 11 միլիոնը՝ կատուներ, իսկ 9.1 միլիոնը՝ շներ։ Նույն ընթացքում 15 տարեկանից ցածր տարիք ունեցող երեխաների թիվը Իտալիայում կազմում է շուրջ 7.6 միլիոն, ինչը երկրի մոտ 59-միլիոնանոց բնակչության 12.89%-ն է միայն։ Արդյունքում, ավանդական ընտանեկան արժեքներով հայտնի երկրում կենդանիների քանակը բազմակի անգամ գերազանցում է երեխաների թվաքանակին։

Այս ամենի հիմնական պատճառներից են ժողովրդագրական տվյալները․ Իտալիայում ծնունդների տարեկան ցուցանիշը նվազել է՝ հասնելով պատմականորեն նվազագույն՝ շուրջ 393,000 մակարդակի, իսկ ծնելիությունը կազմում է 1.18 երեխա՝ մեկ կնոջ հաշվարկով։ Միևնույն ժամանակ, ընտանի կենդանի պահելու միտումն աճում է, և այժմ իտալական տնային տնտեսությունների 54.5%-ն ունի առնվազն մեկ կենդանի։

Այս վիճակագրական տվյալների հետևում մշակութային փոփոխություն է․ երիտասարդ իտալացիները տնտեսական անկայունության, բնակարանային բարձր ծախսերի և կենսակերպի փոփոխման պատճառով հաճախ հրաժարվում են կամ հետաձգում են ծնող դառնալը՝ նախապատվությունը տալով ընտանի կենդանիներին։

Այս ամենի արդյունքում ձևավորվել է նոր շուկա, որտեղ ընդլայնվում են կենդանիների ռեստորանները, շների հացաբուլկեղենի կետերն ու խնամքի սրահները։ Երևույթը, անկախ նրանից՝ դիտարկվում է որպես սեր կենդանիների հանդեպ, թե ժողովրդագրական ապագայի ազդանշան, դարձել է ժամանակակից Եվրոպայի ակնառու մշակութային փոփոխություններից մեկը։