Զելենսկին հայտարարել է, որ Իրանն արդեն պատերազմում է Ուկրաինայի դեմ

Ուկրաինայի նախագահ Վլադիմիր Զելենսկին Sky News-ին տված հարցազրույցում հայտարարել է, որ Իրանը փաստացի ներգրավվել է Ուկրաինայի դեմ պատերազմում՝ Ռուսաստանին ռազմական աջակցություն ցուցաբերելով։

Այսպես նա մեկնաբանել է Իրանի արտգործնախարար Աբբաս Արաղչիի հնչեցրած սպառնալիքները։

«Եթե Իրանը պատերազմի առաջին տարվանից Ռուսաստանին տրամադրել է Shahed անօդաչուներ, հազարավոր ԱԹՍ-ներ, նոր տեխնոլոգիաներ և դրանց արտադրության լիցենզիաներ, ապա արդյո՞ք դա հարձակում չէ Ուկրաինայի վրա։ Կարծում եմ՝ այո»,- ասել է Զելենսկին։

Նրա խոսքով՝ Ուկրաինան պետք է զգուշավոր գործի, որպեսզի թույլ չտա նոր ճակատի բացում, սակայն միաժամանակ պատրաստ լինի ցանկացած սցենարի։

Զելենսկին նաև հայտարարել է, որ Իրանը և Հյուսիսային Կորեան արդեն հարձակվել են Ուկրաինայի վրա, քանի որ պատերազմի սկզբից Ռուսաստանին մատակարարել են զենք, Shahed անօդաչուներ, հրթիռներ, հրետանային արկեր, իսկ Փհենյանը նաև շուրջ 10 հազար զինծառայող է ուղարկել։

Ավելի վաղ Իրանի արտգործնախարար Աբբաս Արաղչին հայտարարել էր, որ Կասպից ծովում իրանական առևտրային նավի վրա հարձակումը «չի կարող անպատասխան մնալ»։ Իրանի ԱԳՆ-ն էլ պնդել էր, թե այդ միջադեպը վկայում է Կիևի «թշնամական և իռացիոնալ» քաղաքականության մասին։

Զելենսկին նաև հայտնել է, որ Ուկրաինան միջազգային գործընկերներին կփոխանցի հետախուզական նոր տվյալներ Ռուսաստանի և Իրանի համագործակցության վերաբերյալ՝ նշելով, որ Մոսկվան, մասնավորապես, օգնում է Թեհրանին Մերձավոր Արևելքում ամերիկյան ռազմական օբյեկտների վերաբերյալ արբանյակային հետախուզական տվյալներով։