Ռուսաստանը տնտեսական աճի տեմպերով գերազանցում է Եվրամիությանը․ Պուտին

ՌԴ նախագահ Վլադիմիր Պուտինը Պետդումայի VIII գումարման պատգամավորների հետ հանդիպման ժամանակ հայտարարել է, որ Ռուսաստանի տնտեսությունը գնողունակության համարժեքության (PPP) ցուցանիշով շարունակում է զբաղեցնել 4-րդ տեղն աշխարհում և 1-ինը Եվրոպայում։

«Վերջին երեք-չորս տարիներին Ռուսաստանը, ի տարբերություն աշխարհի մյուս զարգացած տնտեսությունների, գնողունակության համարժեքության ցուցանիշով պահպանում է 4-րդ տեղն աշխարհում՝ Չինաստանից, ԱՄՆ-ից և Հնդկաստանից հետո, և առաջին տեղը՝ Եվրոպայում»,- ասել է նա։

Պուտինի խոսքով՝ տնտեսական աճի տեմպերով Ռուսաստանը նույնպես գերազանցում է Եվրամիությանը։ Միաժամանակ նա նշել է, որ երկրի առջև կան որոշակի ռիսկեր, այդ թվում՝ գնաճի արագացման հավանականությունը։

Նրա խոսքով՝ ներկայիս տնտեսական քաղաքականության գլխավոր առավելությունը ռուսական տնտեսության և ֆինանսական համակարգի կայունությունն է, ինչը հնարավորություն է տալիս զարգացնել արդյունաբերությունը, պաշտպանական ոլորտը և սոցիալական ծրագրերը։

Պուտինը նաև նշել է, որ Ռուսաստանը գտնվում է բարդ պատմական ժամանակաշրջանում, սակայն, իր գնահատմամբ, այդ փուլն անցնում է արժանապատվորեն։

Ավելի վաղ Ռուսաստանի Կենտրոնական բանկի նախագահ Էլվիրա Նաբիուլինան հայտարարել էր, որ երկրի տնտեսական աճի հիմնական նախապայմաններն են աշխատուժի հասանելիության ապահովումն ու աշխատանքի արտադրողականության բարձրացումը։