Սաուդյան Արաբիան հայտարարել է ԱԹՍ-ների հարձակման մասին

Սաուդյան Արաբիայի պաշտպանության նախարարությունը հայտարարել է, որ երկրի հակաօդային պաշտպանության ուժերը խոցել են մի քանի անօդաչու թռչող սարքեր, որոնք Իրաքի տարածքից ուղղվել էին թագավորության արևելյան նավթային օբյեկտների ուղղությամբ։

Պաշտոնական հայտարարության համաձայն՝ անօդաչուները արձակվել են Իրաքում գործող, «Իրանին կողմնորոշված» զինված խմբավորումների կողմից։ Էր Ռիադը պնդում է, որ բոլոր թիրախները ոչնչացվել են մինչև հարված հասցնելը։

Միաժամանակ իրաքյան լրատվամիջոցները հաղորդում են, որ Սաուդյան Արաբիայի Արևելյան նահանգի նավթային օբյեկտներում և մայրաքաղաք Էր Ռիադի շրջանում մի շարք պայթյուններ են որոտացել։

Տարածաշրջանում ուժեղացվել են անվտանգության միջոցառումները, դեպքի վայրերում աշխատում են արտակարգ ծառայությունները։ Վնասների և հնարավոր տուժածների վերաբերյալ պաշտոնական տվյալներ դեռ չեն հրապարակվել։

Սաուդյան իշխանությունները նաև հայտարարել են, որ իրենց իրավունք են վերապահում պատասխան քայլեր ձեռնարկել Իրաքի նկատմամբ։