2006 թվականից ի վեր առաջին անգամ Թուրքիան կործանիչներ կուղարկի Բալթյան երկրներ

Օգոստոսին թուրքական հինգ F-16 կործանիչ և 76 զինծառայող կժամանեն Էստոնիա։ Նրանք կտեղակայվեն Էմարի ավիաբազայում՝ փոխարինելով այնտեղ հերթապահություն իրականացնող պորտուգալական զորախմբին՝ Baltic Air Policing առաքելության շրջանակում։ Թուրքական զորախումբը Բալթյան երկրներում կմնա 2026 թվականի օգոստոսից մինչև նոյեմբեր։

Անկարան Էստոնիա է ուղարկում 181-րդ ավիաէսկադրիլիայի կործանիչները, որը համարվում է Թուրքիայի ռազմաօդային ուժերի ամենամարտունակ ստորաբաժանումներից մեկը։ Այն զինված է Թուրքիայի ռազմաօդային ուժերի ամենաժամանակակից սերիական տարբերակով՝ F-16C/D Block 50+ կործանիչներով։

Block 50+ տարբերակն առանձնանում է ֆյուզելյաժի վերին հատվածում տեղադրված լրացուցիչ վառելիքային բաքերով, AN/APG-68(V)9 ռադիոլոկացիոն կայանով, որը խոշոր թիրախների հայտնաբերման հեռավորությունը հասցնում է մինչև 300 կմ, ինչպես նաև ցամաքային թիրախներին հարվածելու բարելավված հնարավորություններով։

Թուրք օդաչուների նախորդ հերթապահությունը Բալթյան երկրներում տեղի է ունեցել 2006 թվականին՝ Լիտվայի Շյաուլյայի ավիաբազայում։

Բալթյան տարածաշրջանում ՆԱՏՕ-ի կործանիչները հիմնականում ուղեկցում են Ռուսաստանի ռազմական ինքնաթիռներին, որոնք թռչում են Բալթիկ ծովի վրայով կամ դեպի Կալինինգրադ։

Թուրքիայի ներգրավումը տարածաշրջանում հերթապահությանը դիտարկվում է որպես ՆԱՏՕ-ի անդամ երկրների մասնակցության ընդլայնում՝ Ռուսաստանի սահմանների մոտ դաշինքի դիրքերի ամրապնդման շրջանակում։