Դատարանը մերժել է Սամվել Կարապետյանի հայցն ընդդեմ Հայկ Կոնջորյանի

Երևան քաղաքի առաջին ատյանի ընդհանուր իրավասության դատարանը մերժել է Սամվել Կարապետյանի հայցն ընդդեմ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանի՝ զրպարտություն հանդիսացող փաստացի տվյալները հրապարակայնորեն հերքելու, հրապարակայնորեն ներողություն խնդրելու և փոխհատուցում վճարելու պահանջի մասին։

2025 թվականի հունիսի 17-ին ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը Ազգային ժողովի նիստում անդրադարձել էր գործարար Սամվել Կարապետյանի կողմից իշխող «ՔՊ» կուսակցության հասցեին հնչեցված քննադատությանը։ Մասնավորապես, պատգամավորը պատասխանել էր Սամվել Կարապետյանի հայտարարությանը և հայտնել իր քննադատական դիրքորոշումը։

Նշված գործով Երևան քաղաքի առաջին ատյանի ընդհանուր իրավասության դատարանը 2026 թվականի հուլիսի 23-ին վճիռ է կայացրել, որով ամբողջությամբ մերժել է Սամվել Կարապետյանի հայցապահանջը։

Դատարանը հաստատված է համարել փաստաբանի ներկայացրած իրավական փաստարկը՝ հիմնված ՀՀ Վճռաբեկ դատարանի և ՄԻԵԴ նախադեպերի վրա, ըստ որի՝ կողմերը հանրային անձինք են, որոնք ծավալում են հասարակական և քաղաքական գործունեություն, հետևաբար պետք է պատրաստ լինեն իրենց հասցեին հնչող քննադատություններին ու նույնիսկ սուր, տհաճություն պատճառող գնահատականներին՝ դրսևորելով հանդուրժողականության առավել բարձր մակարդակ։

Բացի դրանից, դատարանն արձանագրել է, որ Հայկ Կոնջորյանն իր հայտարարությունն արել է Ազգային ժողովի ամբիոնից՝ պատգամավորական լիազորությունների կատարման ընթացքում, ուստի օգտվում է գործառութային անձեռնմխելիությունից և Սահմանադրության համաձայն պատգամավորական գործունեության ընթացքում արտահայտած կարծիքի համար չի կարող պատասխանատվության ենթարկվել։