Պայթյունՙ Թբիլիսիի բնակելի շենքերից մեկում. կան զոհեր և վիրավորներ
Այսօր երեկոյան պայթյուն է տեղի ունեցել Թբիլիսիի հյուսիսային շրջանի ինըհարկանի բնակելի շենքերից մեկում, ինչի հետևանքով 3 մարդ է մահացել, 5-ը վիրավորվել են: Այս մասին գրում է ТАСС գործակալությունըՙ հղում կատարելով Վրաստանի ՆԳՆ ներկայացուցչին:
Նախնական տեղեկություններովՙ պայթյունը տեղի է ունեցել բնական գազի արտահոսքի պատճառով: Ըստ երկրի ՆԳՆ ներկայացուցչիՙ պայթյունից տուժած մուտքի բնակիչներին տարհանել են: Պայթյունի հետևանքով շենքում կոտրվել են ապակիներն ու վնասվել պատերը:
Վիրավորներին հիվանդանոց են տեղափոխել: Նրանց թվում երեք երեխա կա: Հիվանդանոցում վիրավորներին այցելել է երկրի առողջապահության նախարարը: Դեպքի վայրում են վարչապետ Մամուկա Բախտաձեն և Թբիլիսիի քաղաքապետ Կախա Կալաձեն:
