Հայտնի է, թե ե՞րբ կհրապարակվեն ԱԺ նախագահի ու հանձնաժողովների նախագահների անունները
Մինչեւ շաբաթվա վերջ կհրապարակվի ԱԺ նախագահի, հանձնաժողովների նախագահների անուները: Այս մասին NEWS.am-ի հետ զրույցում ասաց ՀՀ փոխվարչապետի պաշտոնակատար Տիգրան Ավինյանը:
«Կարծում եմ՝ շաբաթվա վերջին վերջնականապես կհասկանանք՝ ով որտեղ կլինի՝ օրենսդիրում, թե գործադիրում: Այնուամենայնիվ նայելու ենք՝ ըստ ունակությունների եւ հմտությունների համապատասխանության, եւ ով որտեղ ավելի օգտակար կլինի:
Տիգրան Ավինյանը հավելել է, որ ԱԺ նախագահի հավանական թեկնածուների անուններ իրենք քննարկել են, մյուս շաբաթ վերջնական պատկերը պարզ կլինի:
Իրական ընդդիմությունը, իմ համոզմամբ, «Իմ քայլը» ֆրակցիայի ներսում է լինելու․ ասաց Ավինյանը։ Նրա խոսքով՝ «88 հոգանոց ֆրակցիայում, որտեղ ներառված են տարբեր քաղաքական հայացքների տեր մարդիկ, չեն կարող չլինել որոշակի բախումներ, քնարկումներ, քննադատություն իրար նկատմամբ, եւ կարծում եմ՝ իրական ընդդիմության խնդիր մենք չենք ունենալու, որովհետեւ «Իմ քայլը» դաշինքի ներսում նմանատիպ քննադատություն լինելու է»:
Հարցին, թե արդյոք «Բարգավաճ Հայաստան» եւ «Լուսավոր Հայաստան» կուսակցություններին տեսնում է ընդդիմության դերում, Տիգրան Ավինյանը պատասխանեց. «Եթե ֆորմալ ըննդիմության մասին է խոսքը, միանշանակ տեսնում եմ, որովհետեւ ակնհայտ է, որ կոալիցիա չի կազմվելու այս 2 կուսակցությունների հետ, եւ հետեւապես նրանք լինելու են ֆորմալ ընդդիմություններ, իսկ թե ինչպիսի ընդդիմություն կլինեն իրականում, ցույց կտա ժամանակը»:
Իսկ թե ինչով է տարբերվելու այս խորհրդարանը նախորդ խորհրդարաններից, Ավինյանն ասաց՝ համոզված է, որ այս խորհրդարանը մաքսիմալ քաղաքական է լինելու. «Այն մարդիկ, որոնք ներկայացված են լինելու խորհրդարանում, քաղաքական մարդիկ են»:
Հարցին, թե իշխանության որ թեւում է հակված գործելու, նա նշեց, որ իր փորձն ավելի համահունչ է գործադիրին, սակայն օրենսդիրում նույնպես, կարծում է, կարող է օգտակար լինել իրենց խմբակցությանը եւ հայ ժողովրդին:
