«Մռութներ ջան,էրեխեք ջան, վաղվանից գնացեք դասի». Փաշինյան՝ ավելի քան 10 օր դասադուլ անող աշակերտներին
Վարչապետ Նիկոլ Փաշինյանն այսօր առավոտյան գնացել էր Չարենցավան՝ հանդիպելու 2 շաբաթից ավելի դասադուլ անող ուսուցիչների, ծնողների, դպրոցի ժամանակավոր պաշտոնակատար Լուսինե Կարապետյանի, ընտրված տնօրեն Աննա Բալյանի եւ կատավարման խորհրդի անդամների հետ: Խոսքը N 3 հիմնական դպրոցի մասին է։ Ծնողները պահանջում են, որ տնօրեն մնա իրենց հին տնօրենը՝ Լուսինե Կարապետյանը:
Դպրոցում խորհրդակցություն տեղի ունեցավ խնդիրը ներկայացնող բոլոր կողմերի մասնակցությամբ: Վարչապետը լսելով կողմերին՝ հայտնեց, որ իրավական առումով որեւէ բան փոխել չեն կարող, ուստի Կոտայքի մարզպետի կողմից Աննա Բալյանը պետք է նշանակվի: Մյուս կողմից Փաշինյանը իրավապահ մարմիններից պահանջել է քննել եւ հասկանալ՝ իսկապես եղե՞լ են ճնշումներ խորհրդի անդամների հանդեպ:
Վարչապետը դուրս եկավ դպրոցի բակ եւ դիմելով հավաքվածների հայտնեց, որ ընտրության արդյունքները չեղյալ հայտարարելու որեւէ հիմք չկա եւ եթե ճնշումներ եղել են, իրավապահ մարմինները պետք է քննեն: Այսօր երեկոյան, մարզպետն ընտրված տնօրենին կնշանակի, որովհետեւ ուրիշ տարբերակ օրենքով չկա: Որպես վարչապետ, ես չունեմ որեւէ լիազորություն փոխելու որեւէ բան օրենքից դուրս, որովհետեւ տնօրենին ես չեն նշանակում»:
Նիկոլ Փաշինյանի հայտարարությանը հաջորդեցին վանկարկումները՝ «Բալյան հեռացիր»: Փաշինյանը դիմեց աշակերտներին․ «Մռութներ ջան, էրեխեք ջան, վաղվանից նորմալ հաճախեք դասի, որովհետեւ դպրոցը տնօրենը չի, այնպես, ինչպես երկիրը վարչապետը չի, մարզն էլ՝ մարզպետը: Դպրոցի կարգուկանոն պահողը պետության կողմից նշանակված տնօրենն է, ոչ թե նրա անուն-ազգանունը, այլ կարգավիճակը»։
NEWS.am-ի տեղեկություններով, մեկ տասնյակից ավելի ուսուցիչներ ազատման դիմումներ են գրում: Հավաքված ծնողները հայտնեցին, որ չէին սպասում նման հանգուցալուծման․ իրենք պատրաստվում են երեխաներին դպրոցից հանել։
