ՀՀԿ–ում քննարկվում է Սերժ Սարգսյանին փոխարինելու հարցը. «Փաստ»
«Փաստ» օրաթերթի տեղեկություններով` արտահերթ խորհրդարանական ընտրություններից հետո արշալույսներն այնքան էլ խաղաղ չեն Հանրապետական կուսակցության ներսում:
«Խնդիրը միայն դառը հիասթափությունը չէ, որ այս ուժը խորհրդարան չի անցել: Հարցն այն է, որ, մեր ունեցած տեղեկություններով, կարծիքների լուրջ բախում է եղել ընտրությունների արդյունքներն ընդունել–չընդունելու, ինչպես նաև Սերժ Սարգսյանի որոշ գործողությունների հետ կապված։
Մի քանի հանրապետականներ պնդել են, որ անհրաժեշտ է բողոքարկել ընտրությունների արդյունքները: Բայց մեծ մասն աննպատակահարմար է գտել այս փուլում իրավիճակը սրել՝ հաշվի առնելով հասարակական տրամադրությունները, ինչպես նաև այն հանգամանքը, որ շատ բարդ է լինելու որոշակի փաստեր ներկայացնել, որոնք փոքրիշատե համոզիչ լինեն»,– գրում է թերթը:
Պարբերականի ՀՀԿ–ի աղբյուրները պնդել են, որ մի շարք հանրապետականներ խուլ դժգոհություն ունեն Սերժ Սարգսյանից, որը, նրանց համոզմամբ, փաստացի տապալեց կուսակցությունը՝ ապրիլին առաջադրվելով որպես ՀՀ վարչապետ, այս ընտրություններին էլ ցուցակի մեջ միանձնյա որոշմամբ ընդգրկելով Դավիթ Շահնազարյանին ու Արտաշես Գեղամյանին, ավելին՝ նրանց ակտիվորեն ներգրավելով քարոզարշավի մեջ։
Պարբերականը չի բացառում, որ առաջիկայում իսկապես կարող է դրվել կուսակցության ղեկավարի փոփոխության հարցը:
