Դեկտեմբերի 7-ին քարոզչություն չենք իրականացնի․ Նիկոլ Փաշինյան

Դեկտեմբերի 7-ին երկրաշարժի 30-րդ տարելիցն է, և մենք այդ օրը քարոզչություն չենք իրականացնի: Այս մասին այսօր Մասիս քաղաքում հայտարարեց ՀՀ վարչապետի պաշտոնակատար, դաշինքի առաջին համար Նիկոլ Փաշինյանը` ավելացնելով, որ այդ օրը լինելու են աղետի գոտում։ Դեկտեմբերի 7-ին ՀՀ կառավարության արտագնա նիստը կանցկացվի Գյումրիում, Փաշինյանը կայցելի նաև Սպիտակ և Վանաձոր: Արտաշատում էլ «Իմ քայլը» դաշինքի առաջնորդը հայտարարեց, որ պետք է մերժենք տոտալիտար աղանդները։ «Ես ինքս Հայ առաքելական եկեղեցու հետևորդ եմ, բայց բարձրաձայնում եմ նաև մեր կաթոլիկ, ավետարանական եղբայրներին: Պետք է հավատարիմ լինենք մեր քրիստոնեական արմատներին։ Պետք է մերժենք տոտալիտար աղանդները, որոնք մարդուն զրկում են ազատությունից և ինքնիշխանությունից: Մենք պետք է դա անենք և դա պետք է լինի մեր հաջորդ կարևորագույն խնդիրը», – նշեց նա։