Կիևը պատասխանել է Թեհրանի սպառնալիքներին

Ուկրաինայի արտգործնախարար Անդրեյ Սիբիհան արձագանքել է Իրանի արտգործնախարար Աբբաս Արաղչիի հայտարարություններին՝ ընդգծելով, որ Թեհրանի սպառնալիքներն անհիմն են։

«Իրանի սպառնալիքները ոչնչով արդարացված չեն և անհիմն են։ Թեհրանի ռեժիմը Ռուսաստանի ագրեսիայի անմիջական մեղսակիցն է՝ Մոսկվային զենք մատակարարելով, որի հետևանքով 2022 թվականից զոհվում են ուկրաինացիներ»,- գրել է Սիբիհան։

Նրա խոսքով՝ Իրանը որևէ հիմք չունի զոհի դեր ստանձնելու կամ իր սպառնալիքները ՄԱԿ-ի կանոնադրությանը հղումներով արդարացնելու համար։

Ուկրաինայի ԱԳ նախարարը նաև հայտարարել է, որ Թեհրանը նման հայտարարություններով փորձում է շեղել ուշադրությունը Ռուսաստանի կողմից Սև ծովում քաղաքացիական նավագնացության դեմ իրականացվող գործողություններից, որոնք, ըստ նրա, սպառնում են համաշխարհային պարենային անվտանգությանը։

Սիբիհան նշել է, որ Ռուսաստանի հարձակումները նավագնացության ազատության դեմ կլինեն ՄԱԿ-ի Անվտանգության խորհրդի արտահերթ նիստի առանցքային թեմաներից մեկը, և Կիևն ակնկալում է միջազգային հանրության վճռական արձագանքը։