ԵՊՀ ամբիոնի վարիչը մեղադրվում է 4 հազար դոլար կաշառք ստանալու մեջ

ՀՀ հակակոռուպցիոն կոմիտեն հայտնում է, որ Երևանի պետական համալսարանի պատմության ֆակուլտետի Հայոց պատմության ամբիոնի վարիչի նկատմամբ քրեական վարույթի նախաքննությունն ավարտվել է։

Ըստ Հակակոռուպցիոն կոմիտեի՝ նախաքննությամբ հիմնավորվել է, որ 2023 թվականի սեպտեմբերի 3-ից պաշտոնը զբաղեցրած ամբիոնի վարիչը, օգտագործելով իր իշխանական և ծառայողական լիազորությունները, կաշառք է պահանջել։

Քննությամբ պարզվել է, որ ամբիոնի վարիչը, ուսանողների ընդունելության հանձնաժողովի վրա ունեցած ազդեցությունն օգտագործելու միջոցով, քաղաքացու՝ ԵՊՀ ընդունվելն անխոչընդոտ ապահովելու նպատակով նրա ազգականից նախ պահանջել է 5 հազար ԱՄՆ դոլար։

Սակարկության արդյունքում, ըստ մեղադրանքի, կաշառքի չափը սահմանվել է 4 հազար ԱՄՆ դոլար։

Ամբիոնի վարիչին մեղադրանք է ներկայացվել խոշոր չափերով կաշառք ստանալու համար։ Նրա նկատմամբ որպես խափանման միջոց կիրառվել է տնային կալանքը։

Քրեական վարույթի նախաքննությունն ավարտվել է, իսկ նյութերը մեղադրական եզրակացությամբ ուղարկվել են ՀՀ հակակոռուպցիոն դատարան։

Հիշեցնենք` մեղադրվողը համարվում է անմեղ, քանի դեռ նրա մեղավորությունն ապացուցված չէ դատարանի՝ օրինական ուժի մեջ մտած դատավճռով։