ՏԵՍԱՆՅՈՒԹ. Ավանում՝ վտանգավոր դիտահոր. «Վեոլիա Ջուրը» խոստանում է շուտափույթ լուծում

Երեկ «Aurora News»-ը  ռադիոլսողներից ահազանգ է ստացել, որ  Ավան վարչական շրջանում գտնվող ճանապարհահատվածում դիտահորի հետ կապված խնդիր կա։

Քաղաքացիները հայտնել են, որ Մյասնիկյան պողոտայից իջնող հատվածում՝ Ավանի կամրջից ներքև, մինչև արագաչափի մոտակայքը, դիտահորը հայտնվել է վտանգավոր վիճակում։

 Մասնավորապես՝ դիտահորի կափարիչը փակ է, սակայն հենց դիտահորը նստվածքի հետևանքով զգալիորեն իջել է  ասֆալտի մակարդակից, ինչի հետևանքով խոչընդոտվում է երթևեկությունը և  վտանգ է ստեղծում  վարորդների համար։

Ահազանգը ստանալուց հետո «Aurora News»-ը դիմել է պատասխանատու կազմակերպությանը՝ «Վեոլիա Ջուր» ընկերությանը։ Ընկերությունից արձագանքել են, որ արդեն իրականացվել են նախնական միջոցառումներ՝ տարածքը թաղանթապատվել է, որպեսզի վարորդները զգուշանան հնարավոր վտանգից և կանխվի վթարային իրավիճակների առաջացումը։

«Վեոլիա Ջուր» ընկերության մամուլի խոսնակ Կարինե Կարապետյանը մեզ հետ զրույցում նշել է, որ ներկայում ընթանում են համապատասխան աշխատանքներ, և խնդիրը նախատեսվում է լուծել առաջիկա օրերին՝ եթե չառաջանան ֆորսմաժորային խոչընդոտներ։

Ըստ ընկերության՝ աշխատանքների ավարտից հետո դիտահորի հատվածը կվերականգնվի և կբերվի անվտանգ վիճակի։