Աբովյանում տեղի ունեցած միջադեպի առթիվ քրեական վարույթ է նախաձեռնվել

Աբովյան քաղաքում տեղի ունեցած միջադեպի վերաբերյալ ոստիկանությունը ձեռնարկել է անհրաժեշտ գործողություններ։ Այս մասին մեզ հետ զրույցում հայտնել է ՆԳՆ մամուլի խոսնակը։

«Տեղեկությունը ստանալուց անմիջապես հետո ոստիկանությունը ձեռնարկել է համապատասխան գործողություններ։ Կանխվել են հետագա զարգացումները, և այս պահին ձեռնարկվում են համապատասխան միջոցառումներ դեպքի բոլոր հանգամանքները պարզելու ուղղությամբ։ Նախաձեռնվել է քրեական վարույթ»,- նշել է ՆԳՆ մամուլի խոսնակը։

Հիշեցնենք, որ ավելի վաղ ֆեյսբուքյան օգտատեր Վահե Աղաջանյանը հայտնել էր, որ Աբովյանի գլխավոր խաչմերուկներից մեկում մի խումբ անձանց միջև վիճաբանություն և ծեծկռտուք է տեղի ունեցել։ Նրա խոսքով՝ դեպքից հետո մասնակիցների մի մասը հեռացել է, իսկ ոստիկանները հասցրել են նրանցից մի քանիսին հայտնաբերել։

Աղաջանյանը նաև գրել էր, որ դեպքը տեղի է ունեցել մարդաշատ վայրում՝ բազմաթիվ անցորդների, այդ թվում՝ երեխաների և տարեցների ներկայությամբ, և կոչ էր արել իրավապահներին հետևողականորեն բացահայտել միջադեպի բոլոր հանգամանքները։