Թումանյանի թանգարանի մասնաշենքի քանդման և նորի կառուցման համար հատկացվել է ավելի քան 822 մլն դրամ

2023 թվականի սեպտեմբերից փակված Հովհաննես Թումանյանի թանգարանի 2-րդ մասնաշենքի քանդման և նոր շենքի կառուցման աշխատանքների համար պետությունը հատկացրել է 822 մլն 499 հազար 354 դրամ։ Այս մասին հայտնում է «Փաստինֆո»-ն՝ հղում անելով պաշտոնական բաց աղբյուրներին։

Ըստ հրապարակման՝ ՀՀ կրթության, գիտության, մշակույթի և սպորտի նախարարությունը նշված գումարը տրամադրել է «Գոհարիկ» ՍՊԸ-ին, իսկ շինարարական աշխատանքների տեխնիկական հսկողության ծառայությունների համար նախատեսվել է ևս 13 մլն 200 հազար դրամ։

«Փաստինֆո»-ի տեղեկություններով՝ «Գոհարիկ» ՍՊԸ-ի ղեկավարն է Սամվել Խաչատրյանը։ Ընկերությունը հիմնադրվել է 1997 թվականին։ Նշվում է նաև, որ Խաչատրյանը նախկինում հայտարարել էր, որ «Արդշինբանկից» 250 մլն դրամ վարկ է վերցրել և այդ միջոցներով կառուցապատել Փաստաբանների պալատի շենքը։

Հրապարակման համաձայն՝ «Գոհարիկ» ՍՊԸ-ի հետ պետական մարմինները պայմանագրեր են կնքել դեռ 2016 թվականից, սակայն դրանց թիվն աճել է վերջին տարիներին։ Ընկերության հետ պայմանագրեր են ունեցել Քաղաքաշինության կոմիտեն, ՆԳ նախարարությունը, ԱԻՆ-ը, ԿԳՄՍ նախարարությունը, Հայաստանի տարածքային զարգացման հիմնադրամը, ինչպես նաև Արթիկի և Աշտարակի համայնքապետարանները։

Միաժամանակ, «Փաստինֆո»-ն նշում է, որ Հովհաննես Թումանյանի թանգարանի 2-րդ մասնաշենքի վերաբացման ժամկետների վերաբերյալ այս պահին պաշտոնական տեղեկություն չկա։