ՏԵՍԱՆՅՈՒԹ.Լավ օրից չէ, որ հոսանքազրկումներ են լինում․ Ռոմանոս Պետրոսյանը՝ ՀԷՑ-ի մասին

Շատ վատթար և խեղված էներգամակարգ ենք ժառանգություն ստացել և մի կերպ սպասարկումն իրականացնում ենք, մինչև կապիտալ խոշոր ներդրումային ծրագրերը կյանքի կոչվեն և էներգահամակարգի վատթար վիճակը շեշտակիորեն բարելավենք. լավ օրից չէ, որ հոսանքազրկումներ են լինում։ Այս մասին այսօր՝ հունիսի 29–ին, ՔՊ–ի կենտրոնական գրասենյակի դիմաց լրագրողների հետ զրույցում նշեց ՀԷՑ ժամանակավոր կառավարիչ Ռոմանոս Պետրոսյանը։

Այն հարցին, թե պետությո՞ւնն է ներդրում անելու, թե՞ մասնավորը, նա պատասխանեց. «Դա արդեն պետականացման վերջնական ավարտից հետո պրզ կլինի. Վերամասնավորեցման դեպքում՝ մասնավորը, իսկ պետականացված մնալու դեպքում պետությունը կամ գուցե կոնցեսիոն կառավարման տրվի, այդ դեպքում կոնցեսորը նաև ներդրումներ անի։ Այս պահին մասնավորների հետ քննարկումներ չկան»։ Ռոմանոս Պետրոսյանը նաև տեղեկացրեց, որ ՀԷՑ–ի պետականացման գործընթացը բավականին ինտենսիվ առաջ է գնում. «Շատ շուտով՝ հուլիսի կեսերին արդեն կառավարությունը որոշում ընդունի հանրության գերակա շահ ճանաչելու, որին կհաջորդեն շուկայական արժեքի գնահատում և փոխհատուցում»։