ԿԸՀ-ն խուժանություն արեց՝ զրկելով ԲՀԿ-ին 200-ից ավել ձայնից. Սաղաթելյան

ԿԸՀ-ն նոր մասշտաբի խուժանություն արեց՝ զրկելով ԲՀԿ-ին 200-ից ավել ձայնից: Այդ մասին հայտարարել է Հայաստան դաշինքի պատգամավոր Իշխան Սաղաթելյանը:

«Քիչ առաջ կենտրոնական ընտրական հանձնաժողովը կատարեց նոր մասշտաբի խուժանություն: Որքան փորձեցին գողանալ քվեները, սխալ գրանցել, որպեսզի երրորդ ընդդիմադիր ուժը խորհրդարան չանցնի, վերջնահաշվարկի արդյունքում Բարգավաճ Հայաստանի ձայները բավարար էին, որպեսզի անցներ խորհրդարան: Տեսնելով, որ էս ճանապարհով այլևս հնարավորություն չկա կանխարգելելու, կենտրոնական ընտրական հանձնաժողովը երկու տեղամասերում, որտեղ Բարգավաճ Հայաստանը ուներ 200-ից ավելի քվեներ, այդ տեղամասերի արդյունքները ճանաչվեց անվավեր: Պատկերացրեք ժողովուրդ, եթե օրը ցերեկով բոլորի աչքի առջև այս մասշտաբի խուժանություն են անում, ընդհանրապես այս ընթացքում ինչեր են սրանք արել: Կարծում եմ, բոլոր ընդդիմադիր քաղաքական ուժերը պետք է դատապարտող և համապատասխան հայտարարությամբ հանդես գան: Մենք կխոսենք նաև մեր գործընկեր ուժերի հետ այս հերթական և խայտառակ ապօրինության դեմ համապատասխան քայլեր ձեռնարկելու ուղղությամբ: Սա է ժողովրդավարության մասին խոսող իշխանությունը: Նիկոլը, որ ասում էր ես ձեռքս կկտրեմ, բայց ժողովրդի քվեին ձեռք չեմ տա, հիմա ինչքան վերջույթ ունի, պետք է հեռացնի»,– նշել է նա: