Ուկրաինան խնդրանքով դիմել է Թուրքիային

Ուկրաինայի արտաքին գործերի նախարար Անդրեյ Սիբիգան հայտնել է, որ Կիևը դիմել է Անկարային՝ Ուկրաինայում իրավիճակի կարգավորման նպատակով Ռուսաստանի և Ուկրաինայի նախագահների հանդիպումը կազմակերպելու խնդրանքով։ Ըստ նախարարի՝ նախատեսվում է, որ բանակցություններին կարող են ներկա գտնվել նաև ԱՄՆ-ի և Թուրքիայի առաջնորդներ Դոնալդ Թրամփն ու Ռեջեփ Թայիփ Էրդողանը։

«Մենք դիմել ենք Թուրքիային՝ դիտարկելու Զելենսկու և Պուտինի մակարդակով հանդիպման կազմակերպման հնարավորությունը՝ նախագահներ Էրդողանի և Թրամփի հնարավոր մասնակցությամբ։ Մենք պատրաստ ենք այդ հանդիպմանը», - նշել է Սիբիգան։

Ռուսաստանի նախագահի մամուլի քարտուղար Դմիտրի Պեսկովը մարտի 15-ին փաստել է, որ ուկրաինական հարցով բանակցային գործընթացում դադար է, քանի որ ԱՄՆ-ն այլ առաջնահերթություններ ունի։ Հաջորդ օրը նա հավելել է, որ ռուսական կողմը սպասում է բանակցությունների նոր փուլին, սակայն հանդիպման վայրն ու ժամկետները հայտնի պատճառներով դեռևս հստակեցված չեն։