ԱՄՆ-ը բանակցությունների համար առաջարկել է 15 կետից բաղկացած տարբերակ. Արաղչի

Իրանի արտաքին գործերի նախարար Աբբաս Արաղչին հայտարարել է, որ եթե Իրանի դեմ հարձակումները դադարեցվեն, ապա երկրի զինված ուժերը ևս կդադարեցնեն իրենց պաշտպանական գործողությունները։ Նրա խոսքով՝ այս հայտարարությունը արվում է Իրանի Ազգային անվտանգության բարձրագույն խորհրդի անունից։

Արաղչին նաև հայտնել է, որ երկու շաբաթվա ընթացքում նախատեսվում է ապահովել անվտանգ նավարկությունը Հորմուզի նեղուցով։ Նրա ձևակերպմամբ՝ այդ գործընթացը կիրականացվի Իրանի զինված ուժերի հետ համակարգմամբ և առկա տեխնիկական սահմանափակումների հաշվառմամբ։

Իրանի ԱԳ նախարարը իր գրառման մեջ շնորհակալություն է հայտնել Պակիստանի վարչապետ Շահբազ Շարիֆին և Պակիստանի բանակի հրամանատար, ֆելդմարշալ Ասիմ Մունիրին՝ տարածաշրջանում պատերազմի դադարեցման ուղղությամբ գործադրած ջանքերի համար։ Նա նշել է, որ արձագանքում է Պակիստանի վարչապետի դիմումին, ինչպես նաև ԱՄՆ-ի կողմից ներկայացված բանակցային առաջարկներին։

Միաժամանակ Արաղչին նշել է, որ ԱՄՆ-ը բանակցությունների համար առաջարկել է 15 կետից բաղկացած տարբերակ, իսկ ԱՄՆ նախագահի հայտարարությամբ՝ Իրանի 10 կետից բաղկացած առաջարկի հիմնական դրույթները կարող են հիմք դառնալ հետագա քննարկումների համար։ Ներկայացված տեղեկությունները հրապարակվել են Իրանի արտգործնախարարի գրառման մեջ և այս փուլում ներկայացվում են որպես պաշտոնական հայտարարություն։