Մակրոնը կոչով դիմել է ԱՄՆ-ին և Իրանին

Ֆրանսիայի առաջնորդ Էմանուել Մակրոնը սոցիալական ցանցերում տեղեկացրել է, որ նախօրեին բանակցություններ է ունեցել ԱՄՆ նախագահ Դոնալդ Թրամփի և Իրանի նախագահ Մասուդ Պեզեշկիանի հետ։ Նա հորդորել է վերսկսել Իսլամաբադում ընդհատված բանակցային գործընթացը, հարթել առկա թյուրըմբռնումները և թույլ չտալ իրավիճակի հետագա սրում։

Մասնավորապես, նախագահն ընդգծել է բոլոր կողմերի կողմից հրադադարի խիստ պահպանման և դրա՝ մինչև Լիբանան տարածման կարևորությունը։ Ըստ Մակրոնի՝ նույնքան առաջնային է Հորմուզի նեղուցի շուտափույթ և անվերապահ վերաբացումը՝ առանց որևէ վճարների կամ սահմանափակումների։ Այս պայմանների ապահովման դեպքում բանակցությունները պետք է օպերատիվորեն վերսկսվեն՝ հիմնական շահագրգիռ կողմերի աջակցությամբ։

Բացի այդ, Ֆրանսիան և Միացյալ Թագավորությունն այս ուրբաթ Փարիզում կազմակերպելու են համաժողով։ Տեսակոնֆերանսի ձևաչափով անցկացվելիք միջոցառումը կհամախմբի այն ոչ պատերազմող երկրներին, որոնք պատրաստ են նպաստել նեղուցում նավարկության ազատության վերականգնմանը, հենց որ անվտանգության միջավայրը դա թույլ տա։