ՏԵՍԱՆՅՈՒԹ. Ալեն Սիմոնյանը` ադրբեջանցի գործընկերոջ հետ հանդիպման մասին

ՀՀ ԱԺ նախագահ Ալեն Սիմոնյանը դրական է գնահատել ապրիլի 17-ին Ստամբուլում իր ադրբեջանցի գործընկեր Սահիբա Գաֆարովայի հետ հանդիպումը:

Այս մասին Սիմոնյանը հայտնել է ադրբեջանական «Real TV» հեռուստաալիքին։


«Հանդիպումը լավ անցավ։ Մենք ոչ մի տարաձայնություն չունեցանք։ Կարող եք զարմանալ, բայց տարաձայնություններ չկան։ Կա փոխըմբռնում, համագործակցություն և ապագա համագործակցության պլաններ։ Քննարկումների ժամանակ մենք որևէ խոչընդոտ չունենք և հույս ունեմ, որ չենք էլ ունենա», - ասել է Սիմոնյանը:

Պատասխանելով Բաքվի և Երևանի միջև առևտրատնտեսական կապերի հաստատման վերաբերյալ հարցին՝ Սիմոնյանն ընդգծել է փոխադարձ առևտրի զարգացման անհրաժեշտությունը։

«Ես վաղուց եմ այդ մասին ասում. մենք պետք է առևտուր անենք։ Կարծում եմ՝ պետք է ընդլայնենք այս համագործակցությունը։ Որքանով տեղյակ եմ, գործարարները, կառավարությունները և համապատասխան կառույցներն արդեն աշխատում են այդ ուղղությամբ, և դա շատ լավ է։ Հանուն երկու երկրների շահերի՝ անհրաժեշտ է շարունակել և խորացնել այս աշխատանքը», - «Real TV»-ի փոխանցմամբ ասել է Սիմոնյանը:

ԱԺ նախագահը դրական է գնահատել նաև երկու երկրների քաղաքացիական հասարակության ներկայացուցիչների փոխադարձ այցելությունները։