Փեզեշքիանը՝ միջուկային ծրագրի շուրջ ստուգումների և տարածաշրջանային երկխոսության մասին

Իրանի նախագահ Մասուդ Փեզեշքիանը հայտարարել է, որ Թեհրանը պատրաստ է ցանկացած ստուգման՝ ապացուցելու, որ իր միջուկային ծրագիրը միտված չէ զենքի ստեղծմանը։

Նրա պնդմամբ՝ Իրանը բազմիցս հայտարարել է՝ չի ձգտում միջուկային զենքի ստեղծմանը և այդ հարցում հանդես է գալիս բաց ու անկեղծ դիրքորոշմամբ։ 

Փեզեշքիանի խոսքով՝ ԱՄՆ-ի և եվրոպական երկրների կողմից ձևավորված անվստահության մթնոլորտը խոչընդոտում է միջուկային ծրագրի շուրջ բանակցությունների արդյունավետ ընթացքին։ Նրա գնահատմամբ՝ այդ պայմաններում դժվար է հասնել գործնական արդյունքի։

Միևնույն ժամանակ, Իրանի նախագահը նշել է, որ Թեհրանը շարունակում է ակտիվ երկխոսություն հարևան երկրների հետ՝ տարածաշրջանում խաղաղություն և կայունություն ապահովելու նպատակով։ Նա ընդգծել է, որ տարածաշրջանային խնդիրները պետք է լուծվեն տեղական պետությունների մասնակցությամբ։

Հիշեցնենք՝ Օմանի մայրաքաղաք Մասկատում անցկացվել են ԱՄՆ-ի և Իրանի պատվիրակությունների միջև անուղղակի բանակցություններ՝ միջուկային ծրագրի շուրջ։ ԱՄՆ նախագահ Դոնալդ Թրամփը հայտարարել է, որ հանդիպումներն արդյունավետ են եղել և կշարունակվեն։ Իրանի արտգործնախարար Աբբաս Արաղչին  ընդգծել է, որ Թեհրանը պնդում է ուրանի հարստացման իր իրավունքը։