Գերմանիայից Հայաստան փորձել են մաքսանենգ ճանապարհով մոտ 1 մլն եվրո տեղափոխել․ գումարը թաքցված է եղել հագուստներում

Գերմանիայից Հայաստան մաքսանենգ ճանապարհով շուրջ 956 հազար եվրո տեղափոխելու դեպքով երկու անձ է մեղադրվում։ Այս մասին հայտնում է ՀՀ քննչական կոմիտեն։

ՔԿ-ի տվյալներով՝ 2026 թվականի մայիսի 30-ին Հայաստան ժամանած Նիդերլանդների քաղաքացի Ս․Ն․-ն և ՀՀ քաղաքացի Մ․Ն․-ն, նախնական համաձայնությամբ գործելով միասին, Գերմանիայից Հայաստան են տեղափոխել 956 հազար 400 եվրո կանխիկ գումար՝ առանց այն մաքսային հայտարարագրում նշելու։

Գումարը՝ շուրջ 397 մլն դրամին համարժեք, փաթեթավորված է եղել տարբեր անվանական ծրարներով և թաքցված ուղեբեռներում գտնվող հագուստների տարբեր հատվածներում։

ՊԵԿ աշխատակիցները մաքսային զննության ժամանակ հայտնաբերել են ամբողջ գումարը, որն առգրավվել է։

Երկու անձանց նկատմամբ քրեական հետապնդում է հարուցվել՝ նախնական համաձայնությամբ խմբի կազմում առանձնապես խոշոր չափերով կանխիկ դրամական միջոցների մաքսանենգության համար։

Մեղադրյալներից մեկը կալանավորվել է, իսկ մյուսի նկատմամբ կիրառվել է վարչական հսկողություն։

Առգրավված 956 հազար 400 եվրոն ճանաչվել է իրեղեն ապացույց՝ հետագայում դրա հնարավոր բռնագրավումն ապահովելու նպատակով։

Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և գործը դատարան ուղարկելու համար։