Սլովենիան զինվորներ կուղարկի Գրենլանդիա

Սլովենիան երկու զինծառայող կուղարկի Գրենլանդիա՝ Դանիայի գլխավորած զորավարժություններին մասնակցելու համար, հաղորդում է Սլովենիայի հեռագրական գործակալությունը (STA)՝ հղում անելով երկրի պաշտպանության նախարարությանը։

Չորեքշաբթի օրը Դանիայի զինված ուժերը հայտարարեցին, որ ՆԱՏՕ-ի դաշնակիցների հետ սերտ համագործակցությամբ կամրապնդեն իրենց ռազմական ներկայությունը Գրենլանդիայում և կակտիվացնեն կղզում ուսումնական գործունեությունը։ Շվեդիան, Նորվեգիան, Ֆինլանդիան, Ֆրանսիան, Միացյալ Թագավորությունը և Գերմանիան արդեն հայտարարել են, որ զորքեր կուղարկեն Դանիայի ինքնավար տարածք՝ «Արկտիկական ամրություն» գործողության շրջանակներում։

«Կառավարությունը որոշել է Սլովենիայի զինված ուժերի երկու անդամ ուղարկել Գրենլանդիա՝ Դանիայի գլխավորած «Արկտիկական ամրություն» միջազգային զորավարժությունների պլանավորմանը և իրականացմանը մասնակցելու համար», - նշել է գործակալությունը։

Գրենլանդիան Դանիայի թագավորության մաս է կազմում։ Սակայն ԱՄՆ նախագահ Դոնալդ Թրամփը բազմիցս հայտարարել է, որ կղզին պետք է դառնա Միացյալ Նահանգների մաս։ Դանիայի և Գրենլանդիայի իշխանությունները զգուշացրել են Վաշինգտոնին կղզու բռնազավթման դեմ՝ նշելով, որ ակնկալում են իրենց տարածքային ամբողջականության հարգանք։