Վերաքննիչը չի ասել՝ տնային կալանքը սխալ էր, ասել է՝ վաղ էր. Վարդևանյան
«Վերաքննիչ հակակոռուպցիոն դատարանի դատավոր Սուրեն Խաչատրյանը չի ասել, որ Սամվել Կարապետյանի նկատմամբ տնային կալանք չպետք է կիրառվեր, ասել է, որ այդ հարցով վարույթ հարուցելու համար վաղ էր, պետք էր ավելի ուշ հարուցել։ Նա բեկանել է վարույթ հարուցելու որոշումը»։ Այս մասին Հակակոռուպցիոն դատարանի բակում լրագրողների հետ ճեպազրույցում ասել է գործարար Սամվել Կարապետյանի փաստաբան Արամ Վարդևանյանը։
«Տեխնիկական, ֆանտազիայի տիրույթում գտնվող պատճառաբանությամբ է բեկանվել որոշումը։ Բայց չի ասել, որ տնային կալանք կիրառելու մասին որոշումը պետք է բեկանվի և պետք է, օրինակ, կալանք կիրառվի։ Քրեական դատավարության օրենսգրքի համաձայն, եթե առկա է ինտենսիվ խափանման միջոց՝ կալանք կամ տնային կալանք, դրա լրանալուց 5 օր առաջ պետք է երկարաձգման վերաբերյալ միջնորդություն ներկայացնել։ Սամվել Կարապետյանի դեպքում, ըստ քննչական մարմնի, այն լրացել էր հունվարի 13-ին, և քննիչի կողմից ներկայացվել է միջնորդություն տնային կալանքի ժամկետը երկարաձգելու վերաբերյալ։ Դա դիտարկվել է դատավորի կողմից, վարույթ է հարուցվել և այսօր՝ 16։00-ին, դատական նիստ է նշանակվել։ Քրեական դատավարության օրենսգիրքը խափանման միջոցի փոփոխության որևէ կառուցակարգ չի նախատեսում, եթե արդեն հստակ ժամկետն առկա է, չի նախատեսում։
Կա՛մ թո՛ղ գան արձանագրեն, որ ՀՀ–ում քրեական դատավարության օրենսգիրքը դրվում է մի կողմ, կա՛մ պարզապես պետք է ստիպված լինեն կրկին դիտարկել տնային կալանքի երկարաձգման միջնորդությունը, որի վերաբերյալ մենք ունենք առարկություն»,- հավելել է Վարդևանյանը։
Ավելի վաղ հայտնել էինք, որ Վերաքննիչ հակակոռուպցիոն դատարանը բեկանել է դատավոր Սարգիս Պետրոսյանի որոշումը, որով գործարար, բարերար Սամվել Կարապետյանի նկատմամբ տնային կալանք էր կիրառվել։ Սամվել Կարապետյանի նկատմամբ որպես խափանման միջոց ընտրվել է կալանքը ՝ երկու ամիս ժամկետով։
