Գերմանիան իր քաղաքացիներին կոչ է արել լքել Իրանը

Գերմանիայի արտաքին գործերի նախարարությունը հայտարարել է, որ Իրանում ընթացող բողոքի ցույցերի և «հնարավոր ռազմական բախումների» պայմաններում գերմանացի քաղաքացիներին խորհուրդ է տրվում լքել երկիրը։

Գերմանիայի ԱԳՆ կայքում տեղադրված՝ Իրանի վերաբերյալ թարմացված բաժնում նշվում է, որ Գերմանիայի քաղաքացիներին խստորեն խորհուրդ է տրվում լքել Իրանը, քանի որ կա կամայական ձերբակալությունների և կալանավորումների վտանգ։

Նշվում է նաև, որ Թեհրանում Գերմանիայի դեսպանությունը կարող է հյուպատոսական աջակցություն ցուցաբերել միայն սահմանափակ ծավալով, իսկ տարածաշրջանում անվտանգության իրավիճակի հետագա վատթարացումը, ինչպես նաև «նոր ռազմական բախումները», չեն բացառվում։

Գերմանիայի արտաքին գործերի նախարարությունում հավելել են, որ Իրանում գտնվելու ընթացքում պետք է խուսափել քաղաքական միջոցառումներին և ցույցերին մասնակցելուց, ինչպես նաև հեռու մնալ մարդկանց մեծ կուտակումներից։

Հիշեցնենք, որ ԱՄՆ նախագահ Դոնալդ Թրամփը երեկ կոչ էր արել Իրանում բողոքի ցույցերի մասնակիցներին շարունակել իրենց գործողությունները և գրավել պետական մարմինները։