Ռուսաստանն Ուկրաինայի հարցով բանակցություններ չի վարում ոչ մեկի հետ, բացի ԱՄՆ-ից․ Ուշակով

Այս պահին Ուկրաինայի հարցով բանակցություններ են վարում միայն Ռուսաստանն ու Միացյալ Նահանգները։ Ինչպես հաղորդում է APA-ն, այս մասին հայտարարել է Ռուսաստանի նախագահի միջազգային հարցերով օգնական Յուրի Ուշակովը։

Նրա խոսքով՝ Ուկրաինայի հարցով բանակցություններ են վարում միայն Մոսկվան և Վաշինգտոնը, և այս պահին այլ բանակցություններ չեն ընթանում։

«Եվրոպացիները հրաժարվում են բոլոր շփումներից։ Ռուսաստանը չի բանակցում եվրոպական երկրների հետ, բայց պատրաստ է այդ բանակցություններին»,- հավելել է նա։

Կրեմլի պաշտոնյան նաև նշել է, որ Ուկրաինայի վերաբերյալ հնարավոր համաձայնագրերի միջազգային ճանաչումը այժմ քննարկվում է Ռուսաստանի և ԱՄՆ-ի միջև.

«Ես հիմա չեմ անդրադառնա կոնկրետ հարցերին: Այս բոլոր հարցերը բանակցությունների առարկա են, հատկապես ռուսական և ամերիկյան կողմերի միջև»,- ասել է Ռուսաստանի նախագահի միջազգային հարցերով օգնական Յուրի Ուշակովը։