Հայտնի է՝ ինչ պահանջներ է ներկայացրել Վրաստանը՝ Ադրբեջանին և Հայաստանին․ Սաակաշվիլի

Վրաստանի նախկին նախագահ Միխայիլ Սաակաշվիլին հայտարարում է, որ երկրի գործող իշխանությունների հարաբերությունները լարված են դարձել ոչ միայն արևմտյան գործընկերների, այլև Հայաստանի և Ադրբեջանի հետ։ Ինչպես նա գրել է իր ֆեյսբուքյան էջում, Վրաստանի ղեկավարությունը Երևանի հասցեին պահանջներ է ներկայացրել՝ կապված այնտեղ գործող վրացական Հասարակական կազմակերպությունների գործունեության հետ։

«Կոբախիձեն Հայաստանին խնդրում է վտարել վրացական ՀԿ-ներին Երևանից (որն այժմ լի է վրացիներով, քանի որ նախկինում Վրաստանում Արևմուտքի ֆինանսավորմամբ անցկացված կոնֆերանսները բոլորը տեղափոխվել են Երևան) և փակել նրանց հաշիվները։ Փաշինյանի կառավարությունը պատասխանում է, որ Հայաստանը չունի օտարերկրյա գործակալների մասին օրենք և չի նախատեսում այդպիսի օրենք, և վրացիների ազատությունը սահմանափակելու հիմքեր չկան։ Կոբախիձեն, իր հերթին, սպառնում է Երևանին ապրանքների տեղաշարժի սահմանափակումներով», - նշել է Սաակաշվիլին։

Նա նշել է, որ նմանատիպ խնդիրներ են առաջացել նաև Ադրբեջանի հետ։ Սաակաշվիլիի ասելով՝ Թբիլիսին սկսել է խոչընդոտներ ստեղծել ադրբեջանական բեռնափոխադրումների համար, ինչը Բաքվում դժգոհություն է առաջացրել։ Վերջինս ընդգծում է, որ ադրբեջանական լրատվամիջոցներում այս իրավիճակը կապվում է արտաքին ազդեցությունների հետ։